華叔多年前早已睇穿長毛毓民

無法笑

華叔多年前早已睇穿長毛毓民

華叔多年前已唔likey長毛，認為呢條友有破壞無建設，專門搞亂檔。「早在八十年代時，長毛是托派『革馬盟』（革命馬克思主義聯盟）的好戰分子，凡有社會運動，佢就插隻腳入嚟，想煽動群眾跟佢嗰套，當時華叔是運動領袖，對呢班激進派好反感，力阻佢哋干擾，雙方關係都幾敵對。咁多年來，華叔對長毛睇法冇乜點變。

「至於毓民，華叔一直唔當佢係民主派，認為佢同某名嘴一樣，只不過係借勢上位嘅機會主義者，並非真正為推動民主。」

由於華叔早就知道兩條友係乜料，當佢哋提出搞五區總辭之初，華叔已看穿社民連的真正目的，如果民主黨落叠，蠢到全力幫手助選，最後只會拱手將地盤送畀社民連，多年成果一朝消失，到時便悔之晚矣！

至於李柱銘，華叔同佢拍檔多年，知佢政治智慧有限，睇嘢過分天真，好易畀肥佬黎影響。華叔雖然因六四事件同共產黨好唔啱，但始終是一個愛國者，民族主義好強，對肥佬黎及馬丁兩個假洋鬼子在幕後與美國佬之關係不能接受，所以佢從來冇做過肥佬黎老友。

正因為咁，當日肥佬黎請佢去屋企食飯，與馬丁、陳太等人一齊游說佢支持「五區總辭」，佢不為所動，更將醜陋的「密室政治」公諸於世，令全城嘩然。

華叔去年底寄給朋友的聖誕卡，用了辛棄疾和龔自珍的詩，併成「青山不老生嫵媚，綠水長流自纏綿」之句，從字裏行間，反映佢老人家生命力仍然頑強。