高盛「烏輪」散戶等緊收銀

好孩子

高盛早前炮製出「烏輪」，將四隻日經輪之日圓價位轉為港紙嘅方程式中，錯以乘號為除號，非但令人笑爆嘴，散戶更誓要追究其事。
其中一名散戶鄭先生同我哋講，出事後高盛無聯絡過佢點樣善後，而港交所淨係識得講保證散戶唔會有損失，但就唔見有乜動作。鄭先生對兩者都好不滿，決定入稟向高盛索償。
鄭先生雖為散戶，但絕非等閒之輩。佢眉精眼企，喺停牌當日發現四隻「烏輪」嘅價錢超筍，落注五十萬等收割。佢計過條數，照足價收番，佢理應有過千萬元落袋。銀碼咁大，唔追究勢係假。
今趟絕非首趟出現「烏輪」。過去都試過，亦有散戶賺過千萬。輪商學得汽車生產商咁，都有免責條款，但汽車零件出事，啲苦主咪一樣告上庭。高盛如果唔信邪，則不妨問一問豐田。