嘈人超日記

杏仁餅 · 發表於 2008-8-7 09:31:06

8月6日，周三。是日打風，香港停市，日股則大升；滬深三百微升0.69%，收報2721.69。外圍方面，道指真正嘅頂喺2000年；納指2003至07年嘅反彈無法高出2000年嘅水平。道指如扣埋通脹，去年10月嘅高點亦唔及2000年。2003至07年股市嘅上升及經濟嘅再繁榮建基喺金融嘅再膨脹（Reflation）政策，透過CDO製造大量嘅信貸，刺激樓價上升，帶動消費，令經濟出現再繁榮；再膨脹所製造出嚟嘅再繁榮係借番嚟嘅，遲早都要還。去年8月嘅次按危機，CDO泡沫爆破咗，各大金融機構將手上嘅CDO大幅撥備（美林每1美元CDO嘅作價22美仙，另為買家提供75％嘅財務按揭，即係實收5.5美仙，其餘數目日後收唔收到？有賴買家唔好出問題）。

以伊都唔想打仗
去年第四季美國嘅GDP已修正為負增長；今年第一及第二季透過減息及退稅製造增長。美林分析員David Rosenberg喺7月7日估計，今年第三季GDP又見到負增長嘅機會好大；估計明年第一季嘅GDP又再見到負增長。雖然冇連續兩季負增長，但出現綿延起伏嘅衰退（Rolling Recessions）。8月1日分析員估明年標普五百純利只上升2％（7月1日仲估升8％），增長率及P/E亦下降（P/E高低由G增長率決定）。加上分析員習慣咗傾向樂觀，因此明年純利可能連2％增長率都冇。

油價由147美元回落到118.02美元，唔少人睇係好消息。以色列同敍利亞已達成咗和平協議多個月，相信以色列同伊朗最終亦可達成協議，因為兩國都唔想打仗。一旦達成咗協議，油價見100美元（或以下）係可以預計嘅；不過，近期石油股跌幅好細（7月油價未跌，但石油股先跌，此乃我老曹喺7月睇淡油價嘅理由）。擔心石油喺100美元以下（例如90美元）重建基礎，而唔係真正改變方向。油價回落唔係供應上升，而係美國人（根據《巴隆氏》報道）連續十三個星期減少咗揸車（7月份暑假，路上行車里數較去年同期少咗2.2％）。7月27日美國交通部資料顯示，過去七個月美國人減少咗揸車四百萬里，最少係5月，較去年同期跌咗3.7％。

雖然地質學家估計，阿拉斯加近北極圈有九百億桶石油儲存，依家動工開採最少要十年後先有產量。

有人相信油價回落可刺激股市上升，但唔記得咗油價由2001年開始上升；美股由2002年10月開始上升。去年10月後美股回落，油價繼續上升；甚至油價見90美元時，美股大方向仍然唔會改變，因2003到07年美股上升係透過再膨脹製造出嚟。五年再繁榮期由2003年開始，去年結束，例如去年嚟自再按揭產生嘅9000億美元信貸，供消費者用咗，到咗今年上半年，呢支歌仔已冇得唱。透過減息（去年9月到今年4月）、退稅（今年5月）及各國主權基金嘅注資，今年上半年總算過咗，下半年又點？Bridgewater Associates估計，金融機構喺次按虧損嘅數字高過1.6萬億美元，已公布嘅唔夠6000億美元，即係仲有1萬億美元呆壞賬未宣布，到時連主權基金亦頂唔住。因此，全球性信貸收縮係無可避免。

上一個商品牛市由1968到80年共十二年。唔少人（尤其係羅傑斯）認為，依家商品牛市未完。歷史係不斷重演，但每次劇本唔同。我地唔可以將1968到80年嘅歷史照抄一次。上一次商品牛市係日本及西德冒起，改變咗戰後美國雄霸天下嘅局面。今次係金磚四國（中國、印度、巴西同俄羅斯），與日本及西德唔同，金磚四國中，巴西同俄羅斯係原材料嘅出口國；中國同印度亦唔缺原材料，只係到2000年時無法再應付高速出口增長，商品超級牛市係咪今年7月完畢？等時間去證實。

重建美國消費者還錢能力
值得注意係：一、歐美進入咗信貸收縮期，需求增長率喺度下降緊；二、中國嘅宏觀政策出現咗大改變，唔再走粗獷型嘅出口經濟；三、非洲加入咗原材料供應國嘅行列；四、今年原材料價格上升，但資源股股價唔升仲跌；五、資源價格上升太快引發咗需求破壞（Demand Destruction），例如美國人減少咗揸車。

1980年至今嘅環球化，美國製造業有80％已外判；以Nike為例，佢地只做產品研究及發展、設計及市場推廣。生產則外判到世界各地（尤其係中國）。一旦產品滯銷，佢地就減少訂單，首當其衝唔係美國，反而係中國及其他新興工業國。最後搞到美國衰退，好快感染到其他嘅新興工業國。

次按危機爆發，唔係借錢成本太貴而還唔起，係美國嘅消費者還錢能力成疑！上述唔係減息可解決嘅問題，重建美國消費者嘅還錢能力，唔係一年，而係好長好長（日本用咗十三年；香港用咗六年）。

聯儲局維持利率2厘不變，相信喺今年內仍無法加息（去年9月至今年4月已減息3.25厘，今年6月CPI升幅達5％）。銀行手上仲有七千億美元嘅物業貸款，喺失業率上升5.7％（估計年底見6.5％），如上述嘅貸款有25％出事，銀行界就要撥備1750億美元。聯儲局過去接受銀行界4000億美元嘅Mortgage Paper，初期只係作短期抵押；7月30日宣布延期到明年1月，咁樣即係話銀行界無力贖回上述嘅抵押品。點解係明年1月？因為係大選後。估計上述嘅4000億美元Mortgage Paper中，有20％可能出事；即係明年1月聯儲局需承擔800億美元嘅呆壞賬。美國證監宣布阻止沽空三十天亦延長到大選之後！因此，有理由相信今年第三季GDP負增長之後，明年第一季美國GDP又再見到負增長！

戰後嘅美國家庭負債，喺1952年相等於GDP嘅24％，到1965年相等於GDP嘅46％，上升咗接近一倍；由1966年起，喺呢個水平上上落落，一直到1982年起，再由呢個水平上升；到去年美國家庭嘅負債相等於美國GDP嘅98％。唔少人驚青美國經濟已進入類似1966至82年嘅情況，嗰段日子係美國嘅滯脹期（GDP升幅有限，CPI大幅上升，搞到利率大升）。唔少人相信滯脹會重演，但商品價格由1968至80年出現咗十二年牛市，但今次商品價格由2001年10月開始已上升，並已完成5浪上升浪【圖】。我老曹擔心通縮大過通脹。

波羅的海乾貨輪指數由2003年1月嘅1.14，升到去年10月嘅10.8後，回落到今年2月嘅5.5，跌幅相當大。因中國入口嘅需求大增而令波羅的海乾貨輪指數喺今年6月見11.6，出現咗假突破後回落。因受過去年10月至今年2月回落後嘅反彈教訓，家吓反而好少人睇淡乾貨輪嘅前景（雖然租金已係2002年嘅十倍）。我老曹開始擔心乾貨輪租金由今年5月見頂後回落。

價值投資法陷阱
價值投資法（Value Investment）今年受到大屠殺。例如Legg Mason Value Trust過去十五年皆跑贏大市，今年卻下跌41％，因持有大量嘅金融股；Fidelity Growth and Income Fund跌咗31％，理由都係一樣；仲有30億美元資產嘅Oakmark Select基金亦跌咗31％；40億美元資產嘅John Hancock Classic Value基金跌咗41％。畢非德過去成功嘅方法係買入平股等候佢地成長嘅理論已全面受到質疑！因為依家電腦咁普及，資訊咁平（接近免費），價值投資者仲有乜真知灼見？相信買入後持有嘅策略者去年10月至今損失慘重。美林證券分析員Richard Bernstein指出，大部分金融股都變咗價值投資法嘅陷阱。根據日本九十年代嘅經驗，25％金融機構將透過收購、合併及破產而消失。今年能源股及資源股表現亦失色，因美國正進入1990年日本嘅情況，嗰D十八到六十四歲工作嘅人口每年減少0.2％而唔係過去嘅每年上升1％。

油價由2001年起到今年7月急升後Upside down，仲有一流金融股及資源股等。請問仲有乜嘢值得長線持有成世？

有人飛鴿傳書，認為我地面對嘅唔係資產通縮（asset deflation）而係負債通縮（debt deflation）。債券大王格羅斯估計，其中50000億美元嘅債務，受全球地產泡沫爆破，已產生咗10000億美元嘅虧損，只係未公布。歐美國家人民面對地產信貸危機（日本早喺1990年開始；港人1997年第三季亦開始），要幾多年先至搞掂？美國GDP每減少1％，中國出口可減少6％。中國政府決定咗減少對歐美各國嘅依賴，而改為靠自己，經濟由出口帶動改為內需帶動，中國遲早進入第二個繁榮嘅大浪（由內需帶動），但呢段脫胎換骨期好痛苦。幾時先至練成銅皮鐵骨及金睛火眼做齊天大聖（打遍天下無敵手）？

謝國忠擔心奧運後效應喺中國出現，我老曹就唔太擔心。因去年中國喺固定資產投資高達1.7萬億美元，北京只佔480億美元，其中80億美元同奧運有關。未來中國興建嘅項目眾多，少咗80億美元一年又算得D乜？去年10月A股回落嘅理由係中央政府阻止泡沫擴大（A股P/E見四十七倍便回落；日本1989年係六十六倍；香港1973年係一百二十倍）。如果中國出現奧運後效應，反令A股早D見底（例如今年第四季），唔使等到明年年中。

中國遲早雄霸天下
1890年美國人決心成為偉大嘅國家而着手興建基建項目。1907年亨利福特發明咗Model A令揸汽車變得好容易，但缺點係每架生產成本1000美元，唔係個個負擔得起；1913年佢發明咗生產線，透過流水作業，生產經改良嘅Model T，每架售價500美元，其後再減至每架280美元，令美國變咗汽車王國。加上洛克菲勒發明咗新方法提煉石油，令汽油變成好安全（唔會隨時爆炸，今天電影上常見嘅汽車爆炸只係特技），成立標準石油公司；汽車加埋安全汽油唔單止改變咗美國，亦改變埋全世界。當年嘅過度樂觀引發咗1929年嘅華爾街危機，令美國嘅經濟大受打擊；三十年代重建到第二次世界大戰結束令美國雄霸天下。1978年中國人決心再次崛起，透過改革開放政策重建中國嘅基建項目，2007年10月A股狂瀉。如參考美國嘅發展史，2020年中國應雄霸天下。因三億中產階級喺度冒起中。

六十年代美國嘅機構投資者喺發展初階，股票投資中90％係個人（俗稱散戶），佢地嘅投資策略可以好極端，例如100％投入，甚至100％離開；1974年嘅美股大跌就係由極度情緒波動嘅散戶造成。到1980年機構投資者佔股票持股量略高出四分一；散戶略低於四分三，1981至82年熊市跌幅仲好大。到2000年機構投資者所佔嘅比重已超過50％；除散戶所佔比重較大嘅科網股外，道指或標普五百跌幅已唔及1981至82年或1973至74年。

到去年10月呢次跌市，個別行業跌幅可以好大，例如金融及地產股，但道指及標普五百跌幅並唔大，主因係機構投資者唔可能100％離開。換言之，愈多機構投資者參與投資，可大大減少股票嘅波幅。

滬深A股波幅咁大嘅理由，相信同股票90％由散戶揸住有關。

jlwc123 · 發表於 2008-8-7 09:50:10

聯儲局過去接受銀行界4000億美元

哇細拍狼 · 發表於 2008-8-7 10:56:32

jbuilder · 發表於 2008-8-7 12:15:05

<quote>
。唔少人相信滯脹會重演，但商品價格由1968至80年出現咗十二年牛市，但今次商品價格由2001年10月開始已上升，並已完成5浪上升浪【圖】。我老曹擔心通縮大過通脹。
</quote>

5浪上升浪【圖】可有得看?

杏仁餅 · 發表於 2008-8-7 14:06:14

原帖由 jbuilder 於 2008-8-7 12:15 PM 發表

。唔少人相信滯脹會重演，但商品價格由1968至80年出現咗十二年牛市，但今次商品價格由2001年10月開始已上升，並已完成5浪上升浪【圖】。我老曹擔心通縮大過通脹。

5浪上升浪【圖】可有得看?

要用5、6蚊買份包子！

杏仁餅 · 發表於 2008-8-7 17:44:30

今天午餐到很得機吃了兩隻家鄉龜和一碗傻姑飯，
喝了幾杯冰水。
走到街上，滿目瘡痍。颶風把樹木摧殘得滿地枝椏。
還好看見幾個美麗女孩，如花笑艾，才令落魄風景
變得有點生氣。

杏仁餅 · 發表於 2008-8-8 09:57:17

8月7日，周四。本文見報日，係北京奧運開幕時，奧運效應會點？木宰羊；恒生指數打風後升154.45，收22104.2；成交758.97億元。8月期指升78點，收22046點，低水；9月期指更低收21977點，奧運開幕日港股恐怕往下炒矣。

今年8月同去年8月有乜唔同？除咗北京舉辦奧運嘅熱潮外，最大唔同係股票分析師嘅地位。去年8月，股票分析師個個都有金手指，大行推介邊隻股，邊隻股嘅股價便升到唔清唔楚；今天股票分析師早已唔見咗金手指嘅魔力，唔少更變咗千夫所指；尤其係Accumulator依家變咗I kill your later。唔少分析師重新執位（由甲行跳去乙行）或患上嚴重失憶症，唔記得一年前自己講過乜嘢。一年前人人喺度講港股直通車，港股P/E應同滬深A股睇齊（當年A股嘅P/E最高係五十倍）。今天分析師認為，滬深A股嘅P/E應同港股嘅P/E睇齊（依家國企嘅P/E十六倍），真係一個嘴巴兩片唇。

分析員唔係金手指
勇於認錯、永不改過，係股票分析師嘅特有性格。隨住形勢改變，不斷修正自己嘅睇法，從來唔固執己見，先可以喺變幻莫測嘅股市中生存。如你以為股票分析師真係咁醒，而委託佢地幫你理財，係閣下士刁拔。去年10月至今，如虧損少過20%，已經跑贏咗畢非德（連畢非德亦蝕咗20%，你話D股票分析師嘅成績會係點），今年唔少分析師已由年薪幾百萬變咗失業人士。

我老曹無意譏諷股票分析師，因我老曹亦係呢一行出身，只係話畀各位知，我地唔係金手指。喺牛市中個個都可以做股神，熊市一嚟我地都變咗牛鬼蛇神！四十年股市生涯，我老曹亦曾被人封做股神，亦一度被打成牛鬼蛇神。學習凡事處之泰然，只要無愧於心即可。股票分析師既唔係股神，亦唔係牛鬼蛇神，只係普通人。

滬深三百回落0.05%，報2720.44，咁牛皮，可能個個都走去睇奧運唔睇股市。

房貸美第二季蝕咗8.21億美元或每股1.63美元（去年同期賺7.29億美元或每股96美仙）。房利美周五公布業績，又睇吓佢會點。

馬來西亞反對黨領袖安華周四無罪釋放，打算參加8月26日嘅選舉，以便返番國會。3月普選後，反對力量仲差三十席便可從執政黨National Front政府中將權力搶番；換言之，今年第四季對馬來西亞好重要。

英倫銀行好麻煩
英倫銀行幾麻煩，明知5厘息太高但唔敢減息（因歐羅4.25厘，喺可見將來再加息），未來一年喺信貸壓碎（Credit Crunch）嘅力量下，英國出現衰退嘅機會好大。歐洲銀行行長面對德航員工獲加薪5.1％認為極之危險，因7月份歐羅區通脹率已達4.1％（央行目標通脹率係2％）。今年2月鋼鐵工人亦獲加薪5.2％。咁樣落去，通脹率令人擔心，佢揚言盡一切努力去打擊通脹。

一年前全球信貸泡沫爆破，唔少人仲未感到情況好壞（去年9月同10月股市仍升）。依家睇番，情況較去年想像中仲差；不過，今天仍冇人相信美股出現perma bear，一如1990年時冇人信日股熊市會長達十三年一樣，因為人類係天生樂觀。

貝南奇好心做壞事
格蛇利用自己過去做咗聯儲局主席十八年嘅經驗，喺度單單打打；貝南奇因熟讀1929至32年嘅華爾街危機，而過分熱心bailouts。佢不但挽救貝爾斯登，連房利美及房貸美亦救埋；並向各銀行提供4000億美元嘅抵押貸款，7月30日仲宣布，延期到2009年1月先至贖番；去年9月到今年4月高速減息，將利率由5.25厘降到2厘，搞到全人類對美元冇晒信心，引發咗全球性通脹。其他央行嘅熱心程度唔少得過貝南奇，例如英倫銀行、歐洲央行及瑞士國民銀行都參加集體bailouts行動。各個國家更透過主權基金紛紛注資有問題嘅金融機構，反正係蝕人民嘅錢，對自己無關痛癢，蝕完又再注資；真係what a wonderful world!各國央行bailouts，以及主權基金注資，可唔可以阻止美國、英國、西班牙及愛爾蘭嘅樓價下跌？答案係唔得嘅。

至於中國同唔少新興國家過去利用滙價偏低去大量出口，搞到自己國家因賺埋太多外滙而出現流動性過剩，跟住引發咗通脹乃至股市爆煲等等。

今年商品、農產品價格甚至油價亦爆煲；因為中國經濟正由粗獷型經濟走向節約資源及能源經濟，情況好似八十年代嘅日本。資源及能源有更好嘅使用，搞到中國對資源及能源嘅入口依賴下降。之不過同八十年代唔同，當年美國成功控制通脹而進入咗減息周期，刺激房地產、股票及債券嘅價格上升，帶領住全球重新走向經濟繁榮。今次卻面對美國信貸泡沫爆破，令soft loans一下子冇晒，令一個過分槓桿化嘅資本市場面對melt down。美國人過去依賴借貸度日嘅日子，隨住樓價下跌而結束，新興工業國依賴向美國大量出口，維持本土繁榮嘅日子亦冇埋。呢個調整期恐怕較2000年科網股泡沫爆發嘅日子更長同更深。

1968至80年嘅滯脹，CPI升幅一度達14.5％，最終被雪茄伏嘅20厘高息收服。雪茄伏係伏虎降龍嘅英雄，1987年將通脹率收服後，便讓位畀格蛇；過去格蛇一直奉行雪茄伏嘅政策，直到2001年「九．一一慘劇」後，通脹呢頭猛獸由2002年起被放虎歸山，令商品出現咗七年牛市。貝南奇更係蛋頭一名，佢好似唐吉訶德對住風車以為係火龍，滿腦子都係1929年華爾街危機，任何金融機構面對破產佢都bailout，令漸漸再被馴服嘅通脹率，喺利率由5.25厘降到2厘以及美元貶值下又再起動。中醫話，大熱症唔可以一下子壓落去，以免外感傳裏；應該先清咗熱毒，然後再調理身體。去年8月如任由兩到三間金融機構先破產，今年經濟進入冷卻期先減息（一如2000年任由科網股回落，2001年1月先減息），便唔會搞到依家咁嘅局面——通脹及通縮一齊嚟。

未來美國樓價仍有17％嘅下跌空間，英國更有38％【圖】；歐美金融機構點樣承受咁大壓力？泡沫形成嘅過程帶嚟歡樂，爆破必帶嚟苦楚，同時有悔不當初嘅感覺。英國1973年嗰次回落期只得兩年；1989年嗰次回落期五年；今年呢次又唔知要幾耐嘞。

1997至去年美國人話只要買樓便可發達？樓價按年上升，每年只需將D物業加按便可借錢消費。去年起突然發現呢條路唔得，今年更發現自住嘅物業已跌價20％，令自己嘅首期（20％孖展）化為烏有，銀行面對4760億美元壞賬。十年樓夢令美國GDP不斷咁升，消費者不斷咁增加消費。依家樓價下跌，但食物同汽油價格卻上升；家吓不但唔可以再借錢消費，同時生活費上升，更擔心可能失業。前克林頓白宮經濟顧問Nouriel Roubini認為，美國金融業蝕咗約20000億美元，依家只係為次按撥備，仲有好多呆壞賬未宣布。Decision economics環球策略員Allen Sinai認為，美國正步入衰退期，而且又闊又深。

澳洲不利消息湧現
情況開始對澳洲不利，7月CPI升幅達4.5％，而非中央銀行嘅目標通脹率2%至3％；利率高達7.25厘；6月份消費信心跌咗5.6％；物業貸款減少4.2％；失業率4.3％（2月係3.9％）；原材料價格開始回落，影響咗澳洲收入。6月份申請樓按嘅人較5月份再減3.7％，同1月份比較已減少25％；政府宣布今年第二季起，澳洲樓價開始回落。2006年嘅美國、去年嘅英國及今年嘅澳洲亦加入回落行列，澳洲長達十七年嘅增長期亦開始結束。

英國嘅情況更令人擔心，根據Financial Services Authority嘅資料，今年首季被接管嘅住宅共九千一百五十二間，較去年同期嘅六千四百七十一間，上升超過40％；今年首季超過三十萬間樓按延期供款（較去年同期多四萬間），新增延期供款嘅人約五萬四千個，估計第二季情況進一步惡化。

過去新興市場因企業純利高增長，而令P/E較美股高嘅時代，會否反過嚟因企業純利大跌，而令P/E較美股低（過去新興市場股市P/E係較美國低）？商品價格經過七年牛市後會否出現一至三年嘅熊市？喺金融市場唔係表演勇氣嘅地方，保存實力先係唯一嘅真理。喺1997年冇保存實力嘅投資者，依家喺邊？2000年唔肯喺科網股撤退嘅人，依家又喺邊？If there's danger, run away, live to fight another day!（有危險，便走佬，留番條命為明天作戰。）上述係老兵唔死嘅理由。美國人需要一段好長好長嘅時間先可以將負債水平降低。科網股泡沫用咗兩年零八個月，何況呢個次按風暴引發嘅理由係樓價回落。

選擇職業要注意五點
投資有成功有失敗；上述同勤力係無關。成功嘅投資者都了解商業及股市周期而加以利用，不會喺去年10月全身投入，明白潮起潮落嘅威力。冇人喺商業周期低潮ring the bell，例如喺2001年叫你買金及資源股；亦冇人喺高潮時發出all clear嘅訊號。一切都要自己心領神會；升市三五七年便要小心，任何升市短嘅三年，長嘅七年。投資成功第一守則係人地頭腦發熱時，自己最好行開D。

賓州大學調查發現，67%大學畢業生，冇法適應今天嘅job market，可以話係學非所用。

搵到一份人工15000元嘅工作，年年加人工5％，每年把15％收入儲起嚟，每年又喺投資市場賺10％回報，到五十五歲開始踏入退休年齡時擁有幾多？答案係大約800萬元。上述仲未扣除買樓供款及結婚生仔嘅供書教學開支；亦未計未來三十年通脹率蠶食嘅購買力（香港三十年前嘅100萬元購買力，相等於依家嘅3000萬元）。Not bad, but it is still bad!

青春本身係無敵，喺選擇職業之時要注意：一、唔好投身前途有限嘅行業；例如我老曹喺1968年放棄咗紡織業，投身證券業，雖然當年喺紡織廠收入較證券行高30％；二、唔好投身嗰D唔肯擴充嘅企業，公司唔怕細，最重要係老闆要有野心；1973年我老曹放棄咗《明報》，投身《信報》，1973年《明報》老闆已冇野心，反而當年行止兄卻野心勃勃；三、唔好畀工作搵你，而係你去搵工作，向自己心儀嘅企業發自薦信，努力進入自己認為有前途嘅公司，而非到job market搵工做；四、入咗公司後，了解公司嘅目標及方向。協助公司早D達標及追隨公司嘅方向（如自己方向同公司唔同，請早D走人）；五、專注及增加職業上所需嘅知識，建立自己嘅人際關係，年輕人應該肯捱肯博，勇於表現自己，建立自己嘅團隊（一群想法相同嘅年輕人互相鼓勵，齊齊上位）。多D交際，少D打機（或睇電視）。

如冇法喺三十歲前賺100萬元，你嘅前途已令人擔心。三十歲前投資不妨博D（但唔好借錢），甚至輸到乜都無晒亦可從新嚟過，但唔好忘記三件事：Be good（對朋友要好，同時有良好嘅態度）；Be honest（唔好呃人，人地會記你一世）；Be happy（幾時都要快樂，今天輸錢，明天忘記，因為快樂嘅人才會幸運）。

只有咁樣，你先至可以脫穎而出，五十五歲（或六十五歲）退休前可以講句我對今生無悔！如果唔係，你就同賓州大學調查中發現嗰67％大學生嘅情況一模一樣—人到中年萬事憂。

內地主力放落長三角
8月6日國務院總理溫家寶主持召開國務院常務會議，原則上通過進一步推動長江三角洲地區改革開放及經濟社會發展指導意見。

長三角繼珠三角之後，由以前嘅全球製造業中心轉為以服務業發展體系為主。上述嘅指導意見喺學術界已討論咗十幾年，呢次由國務院拍板起航。家吓珠三角佔全國GDP嘅10％；長三角佔全國GDP嘅22％。珠三角以香港及澳門為龍頭，由習近平負責；長三角以上海及天津為龍頭，國務院拍板向四個中心邁進（即國際金融中心、貿易中心、航運中心及經濟中心）。由中央部委到地方嘅政府動用近四百人，動員中科院、社科院、江浙滬三地重點高校、地區規劃研究院學家及知名研究規劃機構。

fantasia · 發表於 2008-8-8 10:01:57

Thanks. I don't have to buy the paper from now on.

哇細拍狼 · 發表於 2008-8-8 10:47:42

thanks!!!

帳號		自動登錄	找回密碼
密碼			註冊