李剛諷長毛未夠班交手

無法笑

李剛諷長毛未夠班交手

中聯辦副主任李剛近期人氣爆燈，走馬燈會見泛民黨派，頻頻上鏡，次次有金句，尋日反擊「長毛」梁國雄形容佢係「九品芝麻官」，更加風趣抵死，話唔知長毛喺立法會又屬於幾品議員呢？ 相信一定高於九品，即係暗寸長毛級數高極有限，未夠班同佢交手。李剛嘅官階屬副部級，點計都唔係九品芝麻官，反而，佢嘅鬥嘴能量級數，同周星馳電影《九品芝麻官》裏面嘅白面判官包龍星有得揮就真！

政界人物針鋒相對，司空見慣，但中聯辦官員向民主派反唇相譏，回歸後唔多見，好似李剛尋日咁精警嘅對白，就更加係鳳毛麟角，值得大家回味。今次鬥嘴，先點火頭嘅係長毛，日前佢話如果李剛邀請見面，佢樂意出席，但形容對方只係九品芝麻官。李剛尋日見完民協，當記者一提到「梁國雄」三個字，佢即刻入晒自動波，主動反擊長毛嘅「九品芝麻官」言論。
「有機會見同品級官員」

一向溫文爾雅嘅李剛，尋日和顏悅色依舊，但說話加入唔少針鋒，佢首先好嚴肅咁話，好感謝長毛嘅抬舉，仲當佢係一名官員，但喺佢心裏，自己只係一名普通嘅社會公僕，佢同其他同事一樣，都係按照中央政府賦予嘅職責，忠誠履行義務。然後，李剛話鋒一轉，寸盡長毛話：「當然我不知道梁國雄先生在立法會裏屬於幾品議員，但是，我相信一定高於九品，也相信他有機會見到和他同品級的官員。」李剛盡顯冷面笑匠本色，現場扑咪嘅記者聽到幾乎笑咗出嚟。

李剛話相信長毛品級高過九品，語帶雙關，可以係十品，亦可以係八品，但無論開邊瓣，都係低班次，李剛話相信長毛有機會見到同自己同品級嘅官員，言下之意，即係叫長毛慳番時間，佢唔會邀約長毛見面。

有建制派議員講，一向知道李剛講嘢唔係硬板板、打官腔嗰隻，但經過呢幾日，先知李剛咁風趣生鬼，好似第一日見完民主黨，喺記者會話未收到喬曉陽來港消息，收到就第一時間通知記者；其後見普選聯後，喺裕華國貨活動向記者匯報會面情況，被問起係咪「降格」，佢反叫記者「唔好自貶身份」，都畀人留下深刻印象。