土炮反擊李小加

好孩子

  港交所行政總裁李小加早前開聲，話有意恢復收市「勁假」機制（即係「競價機制」呢）跟手做埋除名交易嘅諮詢，再加上明年落實嘅第二代延長交易時段，可謂甚有抱負之大龍鳳也。
對小加總裁呢啲大動作土炮證券行唔多 like，好多仲認為咁做法係向國際大戶傾斜，小投資者完全冇着數，甚至食餐晏都要搞到滾水淥腳，而上一次搞競價，搞出個大頭佛，再搞又豈非陸雲廷睇相，唔衰攞嚟衰。今次港交所想隱藏大利市機上買賣雙方證券行的編號，令散戶火上加油，佢哋一向靠呢啲冧巴吼路，冇咗呢啲冧巴咁點搵食吖？雖然中國人從來都係一盤散沙，但今趟俾人逼到埋牆，冇辦法唔反抗。故此佢哋決定團結起來一齊去同小加總裁斟數。此趟反擊能否樂觀？唔敢包，事關傻強已經開晒口撐小加改革。各位本地經紀，亦得與時並進乎？
肥佬黎殺上大陸，唔係出雜誌辦報紙，而係賣其前傳。