再三忠告，投資不是買大細!

雷文

轉貼 - 曹仁超 投資者日記  18-1-2007

全世界睇好係詛咒

　　恒生國企指數由去年10月7000點，升至今年1月3日嘅10877.99，出現調整，下支持係1月11日嘅9466點。如9460點不破，後市睇好；反之，如9466點失守，便得小心，恐怕由去年6月14日開始上升嘅H股喺今年1月3日見頂。換言之，國企指數9466點係H股嘅止蝕位。滬深A股止蝕位喺2750點，如果內地A股指數2750點失守，可以係好大件事也！

　　每年1月我老曹都會喺《信報》做好多展望，但今年例外，理由係我老曹對2007年既唔睇好亦唔睇淡；反之，美國十四間大行今年一致睇好，上一次十二間大行一致睇好係2000年。例如油價下調不利石油股，但有利汽車製造股、航空股同航運股。去年8月至今，上述股份早已牛氣十足。

　　玉米升至十年高位，去年玉米價格已上升86％（同期CRB指數卻回落9.6％），3月期貨成四點一六五美元一蒲式耳，係1996年7月以來最高。全球存量去年9月底減少三分一至八千六百四十萬公噸，主因係消耗量達七億二千五百八十萬公噸。過去七年有六年供不應求，玉米價格上升，令嗰D依賴玉米做原料嘅生物科技股面對成本上升壓力。睇落玉米價格長期仲會上升，因美國用玉米去生產乙醇作為汽車燃料，取代石油。玉米價升，亦令部分股份受惠、部分股份受害。今年類似上述情況好多，即一個因素改變情況下，同時產生受惠股份及受害股份。今年應更加著重於點樣揀股。對一間上市公司嘅最大詛咒係全部分析員一致睇好，因此宜小心H股表現！

　　H股短期仍以震盪調整為主。內地流動性資金過剩已到咗相當嚴重嘅地步，外滙儲備已超過一萬億美元（八萬億元人民幣）。央行只發行二萬億元票據，即係仲有六萬億元資金留喺市場；加上乘數效應，可產生三十萬億元嘅熱錢在市場興風作浪，導致2003年起房地產熱及過去十八個月A股狂潮，令內地A股總市值突破十萬億元。經濟學家吳敬璉認為，只要五分一熱錢流入股市，把A股股價再推高200％亦唔奇，點樣避免股市狂潮？已係內地當務之急。

偏高水平入市代價高

　　今年人民幣再升值嘅幅度同速度，或會超過去年，係家嚇流動性資金泛濫嘅最大成因。響貿易順差繼續創新高嘅局面下，短期內難以根治。以基礎分析，A股已偏離合理價，客觀形勢係股票短期難以驟然擴大供應，流入股市嘅資金卻源源不絕，每日一千億元嘅超大成交繼續支持A股股價，內地投資者唔明白股價上升只係紙上富貴，只有套咗現才係真金白銀。1973年香港唔少人經歷過紙上富貴，到1974年12月已煙消雲散；1997年更多人用市價計自住物業嘅價值，以為自己擁有一千幾百萬財富，2003年才知道原來自己係負資產。作為賭徒，一天未離開賭枱，唔好計自己有幾多身家；作為投資者，一天未套現，所謂財富都只係紙上富貴，唔係真金白銀。內地A股估值係咪合理？各有各睇。高盛報告認為，內地A股響今年仲可再升25％。

　　中國GDP未來十年如保持依家嘅速度增長，2016年將超越日本，到2031年將超越美國。1986年北京著名歌星崔健響北京工人體育館唱《一無所有》，到2006年短短二十年，中國創造咗兩個「一萬億美元」嘅紀錄，外滙儲備打破一萬億美元，內地A股總值亦超過一萬億美元。中國前景當然睇好，因為二十一世紀係中國嘅，一如二十世紀係美國嘅一樣。如果你響1929年9月30日投資美股，當天道指381.17，整個三十年代及四十年代你都幾悲慘；上述指數到1954年才打破。七十年代睇好香港亦好正確，但如閣下喺1973年3月9日恒生指數1774點時入市，下一次恒生指數升穿1800點之時係1980年5月。睇好中國嘅分析唔使爭拗，但響偏高水平入市，代價可以好大。

　　當上海人將屋契攞去當舖當、當中國人買平治汽車要輪候九個月（香港上一次買平治汽車要等九個月，係1997年8月），肯定有D唔妥。2007年中國人係咪一如1990年日本人？1990年曾見過唔少日本女士響中環置地廣場排隊買LV手袋，今天亦有唔少內地女士去尖沙嘴海港中心選購LV手袋，人山人海，何其壯觀也。

　　花旗亞太區首席經濟學家黃益平預計，中國人民銀行今年第一季將再度上調存款準備金率，繼續遏制國內市場過多嘅流動資金。

　　2003年中國連續四年GDP平均增長率響10％以上，同期CPI升幅分別只有3％、3.9％、3％及不足2％。連續四年高增長低通脹，喺中國歷史上比較長，甚至外國亦好少見。今年又點？近期糧價升幅唔細，而糧價佔中國CPI三分一。中國眼前經濟問題唔係GDP增長率，而係非均衡發展。出現非均衡發展係結構性問題，例如製造業本身生命周期已進入衰退期，開始進入重工業及技術進步、資本密集期，但中國卻擁有七億勞動人口。響八十年代，中國GDP每增長一個百分點，就帶來二百四十多萬個就業職位；依家GDP每上升一個百分點，只帶來九十多萬個崗位……。工業進入重工化、技術進步化及資本密集化，需要嘅係高質素工人，中國卻缺乏職業訓練學校；反之，大學教育卻唔少，大量培養出大學生，到社會卻搵唔到工作，市場上需要嘅專業人才，中國培養出來嘅又唔多。今年中國經濟就係面對呢種情況。2003年至今，中國喺固定資產投資上以超過25％速度增加，但消費需求遠遠追唔上，結果生產出來嘅產品只有低價出口到海外，造成大量外貿盈餘及流動資金過剩。上述情況響日本、南韓經濟發展史上皆出現過，處理唔好可以出亂子。講到內需，其實就係收入分配。中國十三億人口中，60％係農村人口，大多數人響過去十年收入其實冇顯著增加，形成內需不足；加上教育費同醫療費過去十年大幅上升，形成儲蓄率偏高，結果資金都湧去房地產及股票市場大炒特炒。上述唔係短期問題，如處理得唔好可以好濕滯。如人民幣大幅升值，將影響出口，繼而影響七億勞動人口生計，所以人民幣唔能夠大幅升值；但每年只升5％，作用又唔大。另一問題係製造業升級走向重工化、技術進步、資本密集化，但中國人口素質未能提升，又應付唔嚟。雖然中國人行已一再收緊銀根，但流動性資金實在太多，無法阻止其流入樓市及股市。可以講今年中國經濟已進入喜中帶憂期，最後能否逃過Boom & Bust命運？我老曹木宰羊。

內地舊稅重提威力待顯

　　國家稅務總局公布，2月1日起正式向房地產開發企業徵收30-60％土地增值稅。上述稅項1993年已推出，但一直冇正式徵收。按照1993年嘅規定，土地增值實行四級超率累進稅，即增值額未超過扣除項目金額50％者抽30％，未超過100％者稅率40％，未超過200％者稅率50％，超過200％者稅率60％；一旦實施，勢令地產公司純利大幅減少。上述稅項1993年係針對炒得熾熱嘅房地產而制訂，自1994年內地樓價下調後就不了了之；呢次舊稅重提，唔知威力如何。

　　京城房地產繼續升溫，五環外房價已升至八千元一平方米。最近東二環開盤嘅「北京上舍」平均價每平方米一萬一千元，較去年8月開盤嘅「保利薔薇」平均價九千八百元又貴好多。去年1至11月全市住宅商品房施工面積五千八百三十七萬八千平方米，較2005年同期下降10.1％；完工面積一千八百二十一萬八千平方米，下降25.2％。去年11月底商品房空置面積八百九十一萬二千平方米，下降20.4％；其中住宅佔四百五十七萬七千平方米，減少32.3％。

　　去年北京寫字樓供應量一萬六千三百七十六套，較2005年上升71％；2005年供應量共一百八十五萬平方米，較2004年增加三十七萬平方米，去年再上升至三百四十一萬平方米，總空置率14％。估計今年北京寫字樓供求已達平衡。

　　上海主要商舖租金去年平均升幅28.9％，平均租金去年12月係四點九美元一平方米一天。大批購物中心響去年落成，開始爭租客。

　　上海工業用地短缺，過去兩年售價亦急升。去年底上海康僑及華莊工業園區售價八百九十九元及七百五十八元一平方米，遠高於無錫新區嘅四百四十九元及蘇州工業園嘅一百八十元；張家港工業園一百三十五元一平方米。今年1月1日起，所有上海工業用地將通過拍賣、競投或上市方式售賣，估計將進一步推高上海工業用地價，未來三至五年，上海工業樓租金估計將大幅上漲。根據美聯物業上海區總經理馮泓睿話，去年12月15日至今，廉價房源佔全部成交房源68％，其中以價值一百萬至一百三十萬元嘅二手房為主；內地二手房交易已重新活躍起來。

美人消費來自信用卡分期

　　廣州方面，今年住房建設共十三萬七千三百套，總建築面積一百三十萬平方米，其中十萬四千一百套係九十平方米以下；住房用地供應量總面積五百零一公頃，但解決住房問題仍要等三年才實現。今年1月16日止總計商品房平均價達七千四百三十八元一平方米，購買力主要來自換房一族。估計今年上半年廣州樓價仍向上，下半年才穩定下來。

　　去年美國消費者約三千億美元消費來自將物業二按。自從去年年中樓價下調後，美國人消費並冇減少，但資金唔再來自物業二按，而係信用卡分期付款。去年11月消費增加一百二十四億美元，其中三分二（八十五億美元）來自信用卡分期付款；過去六個月以年率8.6％速度上升。上述情況令人擔心，因物業二按利率六厘半，而信用卡貸款利率卻高得多。

　　本周一美國冇市，理由係紀念馬丁路德．金被殺，佢嘅名言：I have a dream（我有一個夢），係針對美國黑人不平等待遇。令人擔心嘅係，今年美國人卻生活喺夢境中，過去幾年透過信貸製造出來嘅經濟繁榮，到底可以維持幾耐？如你買一間屋市值十萬美元借五萬美元；嗰間屋升值到二十萬美元，理論上負債比率下降至25％才對。過去十年美國物業升幅超過100％，但物業負債比率只由58％下降至54％，即十年前借五萬元者，去年係借咗十萬（或以上）資金？
　　末日博士問大家，舊年紐約十七萬三千金融業從業員，收入幾多？答案係超過八千四百萬人口嘅越南，即紐約每名金融業從業員收入相等於四百八十五個越南人嘅收入。香港十多萬金融業從業員去年嘅收入，相信亦超過中國境內唔少全省人嘅收入。

　　今年美國CES大展，係全球最有分量嘅消費電子產品展。海爾、聯想（992）、TCL、長虹、夏新、康佳等二十家中國重量級電子產品集團，組成「Top Brands fromChina─中國消費電子領先品牌」，喺國際消費類電子產品展中，設立以「中國企業」品牌作為一個整個推銷項目。經過幾年走出去嘅經驗，中國消費電子企業明白到推銷產品不能只靠打價格戰，而係建立自己嘅品牌形象，被海外媒體及客戶接納；中國產品唔再以便宜取勝，而係又平又靚，係一大改進。

睡睡

多谢

kwy

Thanks!!

biantai06

tks!!

vs

谢帖!