人在中環@AM730

chunho

星期二, 12月 18, 2012
我不知道我是否還喜歡這裡
有個老友同我講，話佢越黎越有移民既衝動。

老友係我響外國讀書時候既同學。大學畢業，佢第一時間衝番黎香港，對鬼佬地方冇半點留戀。呢位老友，一直係非常酷愛香港。佢居然話考慮移民，對我黎講係一種震撼。

老友從事金融業，有車有樓，生活質素其實很不錯。但係佢喜歡自己既工作嗎？唔喜歡，但係又不能夠放棄呢份工作。因為轉行，會搵少好多。

「做香港人，係唔可以冇錢的。」這是老友既comment。

我跟他一起在外國生活過，我明白他這句話背後既意思。響香港地，有錢同冇錢既生活，差距係不合理地大。

「當一間普通既中產樓，動不動都要過千萬既時候，要響香港生活，點可以冇錢？」

於是，不管你幾討厭你果份金融業既工作，你有條件可以放棄嗎？

響香港，唔發狂努力地搵錢，彷彿係一種罪。這種罪，叫做「唔長進」。問題係，「長進」係咪人生既必須？可唔可以「唔長進」既同時，又同時擁有成功既人生？

*****

響番邦讀書既時候，有一個好朋友，佢爸爸係一個裝修既技工。

我其實好喜歡呢位uncle，佢又幽默又隨和，而且熱愛家庭。佢搵錢也許唔係好多，但佢仍然努力供養佢既子女到讀完書畢業自立。佢有一個快樂既家庭，我覺得佢既人生其實蠻成功的。

有一次我問呢個uncle：「諗唔諗住返香港生活呀？」

「唔啦。」uncle答：「我地呢類技工響香港得唔到人尊重，好唔過癮架。響呢度，當我去人地既屋企，解決咗各式各樣既家居問題，客人都會認真地感激我。呢種感激，扮唔到出黎既。但係以前響香港做，幫你做好左，半句多謝都冇。」

我理解。細細個讀書，總會讀過那個有關「職業無分貴賤」既課文。不過所有香港既成年人都知道，職業既「貴賤」，響香港地其實係特別分得清楚的。

因為職業有分貴賤，而真係「貴」既職業其實又少之又少，於是每個人都push自己去行一條疑似可以通往這些工作既道路。這些工作既位置有限，不論有幾多人嘗試去行果條路，行得到終點既人數其實都係一樣。即是話，越多人選擇行呢一條「正路」，越多人嘗試去跟住同一個樣板去過佢地既人生，到最後失敗既人數就會越多。

倒模出來既人生路，你跟住行，其實有冇運行？

*****

有一位朋友同我吹水，話香港人最喜歡怨。

點解咁喜歡怨呢？怨係要為自既失敗搵借口，為佢地能力既不足搵借口。

講呢番說話既朋友，係一位每年搵好多錢既基金經理。我對香港既金融業有點偏見，總覺得，佢地自以為自己睇通世界，但佢地既世界，有時卻細得難以想像。

怨=搵借口，我唔知呢個邏輯係咪正確。但我卻響度諗，假如呢個邏資係冇錯既話，香港人喜歡怨，到底係因為香港有太多失敗既人，抑或香港人比較不願意接受自己失敗呢？

我傾向相信，任何地方既人，都唔係十分願意接受自己人生其實係失敗既。我不能相信，響美國又或者英國既人會比香港既人，更能擁抱失敗。但係如果你覺得，相比外國人，香港人係「特別」喜歡怨三怨四既話，我既推測係，香港人「自認為」自己係失敗者既比例，比響外國來得高。

響香港地，搵唔到錢=失敗。同一條equation，響外國相對冇咁applicable。

於是，響呢一條equation底下，每個人都嘗試避免失敗，於是每個人都跟住同一條「正路」，入大學，畢業，搵份文職工作（最好係金融業又或者專業人仕），工作、超時工作、再工作，期望升職跳糟加人工，然後再工作、工作、結婚、供樓、工作、生仔、工作，再工作。

響呢條equation裡面，冇一個variable係同快樂有關的。

曾經寫過有關有位朋友，讀飽書之後，選擇左去做廚師。警報響起，一眾peer pressure不斷指罵朋友所行既道路偏離所謂「正常」軌跡。偏離軌跡像一項十惡不赦既罪，這條廚師既路，並不好行，但朋友卻得到快樂。

「正路」既路牌話大學畢業既人要搵工。畢業之後我做過幾份「文職」都唔係好掂，於是決定創業。當年呢個決定，同樣觸動「警報系統」，「偏離正軌」既alarm響起，冷言冷語刻薄說話此起彼落。直至今時今日，我依然係抱住同一個疑問：「點解響香港地，每個人都必定要跟住果條『正軌』去過自己既人生？」

當人人都被逼去行同一條路，香港，有時真係太過悶蛋。

chunho

星期二, 11月 20, 2012
北上只因唔想死
這兩個星期都響國內團團轉，幾年前，我大概唔會諗到，今日既我會花咁多時間出差到國內。我其實怕辛苦，既唔喜歡坐飛機，亦怕訓酒店。睡在陌生既酒店床上，我幾乎未試有一晚係訓得好的。

好多生意人都話，北上係大趨勢，因為祖國市場好大好大。你唔上去搵祖國既錢就笨。大家懷住無限既憧憬北上創業；當大家遠眺住呢龐大既市場，彷如望到一部會印銀紙既機器一樣，但當我地呢班香港既商人親身踩入境內，經過現實既洗禮之後，又會發現這個「中國模式」既商業社會，原來同我地響香港所認識既相差甚遠。我地響香港做生意駕輕就熟，北上之後先發覺自己響香港既經驗，多年來自以為已經練成既一套好武功，響國內可以完全耍唔到出黎。

我對大陸既市場冇憧憬，北上之前就知道會遇到極大量既困難。法制唔健全、貪污嚴重、關係網過份複雜、稅率其高…這些問題我在未北上之前就已經預計過。實情係我為左呢啲國內經營既「獨有」困難，在不情不願既情況之下洗左唔少錢。相比法制健全，社會廉潔兼低稅率既香港，香港既營商環境應該比國內好上千百萬倍先係。但可悲既係：即使在國內做生意有大量既困難要面對，而這些困難又會要你洗錢再洗錢，但埋單計數，同一數目既投資，放在國內既回報，依然係遠比放在香港高。就我自己公司既情況，我在國內既分店數目，不及在香港既一半，但稅後既淨利潤，卻比香港多出近一倍。

我大概響三年前，開始將部份業務轉移上大陸。講真，呢個決定從來都唔係因為相信響大陸會賺大錢。令我把心一橫北上，係因為當時其中一間舖夠期續租，業主開出加租三倍既租金。你冇睇錯，唔係「三成」，係「三倍」。當然呢個業主唔係一般小業主，而係屬於「有霸權」既級數，我唔係賣鐘錶珠寶，我既生意冇可能有幾百巴仙既Margin，租金成本本來已經唔輕，再黎一次三百巴仙既加幅，你不如叫我去死。

我響度諗，假設我呢一舖真係survive到你呢三百巴仙既加幅，咁三年之後我再續租，你又加我三百巴仙咁我點捱？如此既事在香港地，我相信其實係會不斷重複再重複。我唔想檔生意就咁死在租金手上，可以做既得兩條路：1)轉型，轉做一啲超高利潤既生意，以抗租金成本瘋狂上升；2) 走佬，走去一啲成本相對穩定既地方。前者既做法，我認為超過九成既生意人都做唔到，生意轉型，講就容易，做起上黎困難重重，風險極高。我認識有行家嘗試轉型，轉左幾圈，最後將自己之前賺落既財富都轉走埋。然而「轉型」同「轉行」，雖然只係一字之差，但當中含意卻差天共地。我認識既行家，最初諗住「轉型」抗租金，最後搞下搞下，變成「轉行」，人到中年先黎「轉行」有幾難，唔洗我講啦。見到太多失敗例子，權衡過風險和輕重後，決定採取「走佬」策略。是真的，北上「創業」，只因為唔想死。

行家既香港業務，我粗略估計有近九成應該係蝕緊錢，餘下既一成，大概係平手又或者有點微利吧。呢兩、三年，我見證左有唔少行家響香港結業，能夠繼續生存既，大都像我一樣，盈利既主要來源，已經唔係響香港。

我唔知響香港現存既社會結構底下，能夠容納到幾多種不同既行業。然而響租金、地價成本高到嚇人既環境之下，中小企既生存能力其實好成疑問。畢竟社會上冇幾多行生意係可以有幾百巴仙margin的。我好佩服好似翠華咁既企業，靠賣奶油豬居然可以抵抗超高租金，仲可以叻到上市集資。然而一個城市，又能有本事出到幾多間翠華？

問心講，我有時都真係會覺得，香港既經濟前景，其實都幾…

mu7324